PASAMBAHAN MINANGKABAU (LANGGAM BANUHAMPU)

DISUSUN OLEH : 

AKMAL St. MUNCAK
(Beralamat di Karatau Parabek Nagari Ladang Laweh Kec. Banuhampu Agam)

Tahun 1996

TARAGAK TAKANA

Bagian 1

Si Pangka :(Diwakili oleh Sutan Bandaro Putiah)

Manyambahkan sambah malah ambo kahadapan Niniak Mamak, sarato silang nan bapangka karajo nan bapokok Niniak Mamak Pangatuo Jambak tampaik ambo manyambahkan sambah.

Mamuhunkan salam ambo kahadapan Tuanku nan duo tigo parsilaan, tampaik ambo mamuhunkan salam.

Tidak terhatap tabilang gala akan penghatap jo pambilang nak jo sambahsajo ambo muliakan dengan sambah. Bukanlah ambo maraso malampau jo malinteh, sapanjang warih nan bajawek, adaik nan bapakai,karano bakai juo manuruik adaik, kok pai lai jo mupakaik, tingga lai jo parundiangan.

Karano lah dilapeh ambo jo hati nan amaik suci, muko nan amaik janiah dek Niniak lah jo Mamak silang nan bapangka karajo nan bapokok, Alhamdulillah lai dari ambo tabiknyo buah pasambahan. Lai Pasambahan di tibokan kabakeh Sutan Maruhun.

Sutan Maruhun          : Lalukanlah

Sutan Bandaro Putiah :Ma Sutan…..

Sutan Maruhun           : Lai Ambo Sutan

Adopun buah pasambahan nan kaditibokan kahadapan Sutan Maruhun, lorong kapado diri Niniak dengan Mamak si alek kami nan pai satampuah lalu pulang sabondong suruik, yo kok di ateh hari nan cako, kok  jauh alah baturuik, dakek nan alah bajalang, janjang tatagak alah batingkek, bandua tabantang alah batapiak, lah lalu karuang tangah duduak hadir baselo di ateh rumah. Kok duduak alah balapeh panek, baranti alah balapeh arak, rokok sabatang alah baisok, siriah sakapua alah bakunyah.

Limbak nan dari pado itu, kok di kamilah Niniak dengan Mamak silang nan bapangka karajo nan bapokok kahadapan Niniak dengan Mamak sialek kami nan pai satampuah lalu pulang sabondong suruik, kok adolah nan banamo taragak takana, takana pado hati, takilan pado mat, suapyo tembak nak basasaran, pandang nak balamaik, alah karancak kato dibari jo panitahan, yo kok bana di tapi mintak diasak bana katangah, bana ditangah mintak digampali. Sakian buah pasambahan ka bakeh Sutan Maruhun……

Jawaban si Alek terhadap permintaan si Pangka (Diwakili Sutan Maruhun)

Sutan Maruhun             : Lah sampai Sutan

Sutan Bandaro Putiah   : Sakiro-kiro alah Sutan

Sutan Maruhun             :

Dikumbalikan juo buah panitahan Sutan nan katangah tadi. Manyambahkan sambah malah ambo kahadapan Niniak Mamak, sarato silang nan bapangka karajo nan bapokok Niniak Mamak Pangatuo Jambak tampaik ambo manyambahkan sambah.

Mamuhunkan salam ambo kahadapan Tuanku nan duo tigo parsilaan, tampaik ambo mamuhunkan salam.

Tidak terhatap tabilang gala akan penghatap jo pambilang nak jo sambah sajo ambo muliakan dengan sambah. Bukanlah ambo maraso malampau jo malinteh, sapanjang warih nan bajawek, adaik nan bapakai,karano bakai juo manuruik adaik, kok pai lai jo mupakaik, tingga lai jo parundiangan.

Karano lah dilapeh ambo jo hati nan amaik suci, muko nan amaik janiah dek Niniak lah jo Mamak  si alek nan pai satampuah lalu pulang sabondong suruik, Alhamdulillah lai dari ambo tabiknyo buah panitahan untuak manjawek panitahan sutan. Ma nyo Sutan?

Sutan Bandaro Putiah     : Lai ambo Sutan

Sutan Maruhun                 :

Yo kok di ateh hari nan cako, a nan jadi buah panitahan sutan nan ka tangah, antah kok hari nan elok, antah kutiko kok nan baiak, Niniak dengan Mamak si alek nan di saru nan alah datang, alek tacinto nan alah tibo, kini lah duduak bahadapan jo silang nan bapangka karajo nan bapokok, sananglah raso dalm hati, nikmat suko salamonyo. Kok duduak alah balapaeh arak, rokok sabatang alah baisok, siriah sakapua alah bakunyah.

Limbak nan dari pado itu, kok di kamilah Ninik dengan Mamak silang nan bapangka, karajo nan bapokok kahdapan Niniak dengan Mamak sialek nan pai satampuah lalu pulang sabondong suruik, kok adolah nan banamo taragak takana pado hati takilan pado mato, supayo tembak nan basasaran, pandang nan ba alamaik, alah ka rancakkato dibari panitahan, yo kok bana di tapi mintak diasak bana katangah mintak di gampali, kan iko bana isinyo Sutan Bandaro Putiah?

Sutan Bandaro Putiah      :  Itu bana nyo Sutan Maruhun

Sutan Maruhun                  : Ma Sutan….

Sutan Bandaro Putiah      : Lai ambo Sutan

Sutan Maruhun                  :

Indak doh lai sapanjang buah panitahan nan katangah di Sutan Bandaro Putiah tadi, bak undang pitua di nan tuo, lai di rasuak manjariau, lai di kasau lakek atok, bapakai sungguah manuruik adaik. Akan tatapi sungguahpun baitu bana sakali, karano bapakai pulo manuruik adaik, undang pitua dinantuo, nan rajo kato mupakaik, nan bana kato saiyo,karano lai lah dihadapan Niniak Mamak silang bapangka karajo nan bapokok, dicarikan bana (kato) nan saiyo, dijapuikkan kato nan sapakaik, karano biang nan tak dapek mancabiak, gantiang nan tak dapek ambo putuih i, nan tuo juo punyo hutang. Mananti sutan kabarinyo, mamintak ambo dengan sambah, ba saba sutan sakutiko, lai kolah banamao dalam adaik, sambah kumbali bakeh Sutan Bandaro Putiah……..

Sutan Bandaro Putiah      : Alah sampai Sutan

Sutan Maruhun                  : Sakiro-kiro alah Sutan

Sutan Bandaro Putiah      :

Dikumbalikan juo buah panitahan sutan nan ka tangah, yo kok di ateh hari nan cako, adopun buah panitahan nan ka tangah di sutan, ndak lai sapanjang bana nan ka tangah di ambo, bak sapantun pituah dinan tuo, alah batang tasanda pado gunuang, urek tahujam kapitalo, lah bakai sungguah dalam adaik.

Akan tatapi sungguahpun baitu bana sakali, karano lai bapakai manuruik adaik, lamak siriah lega carono lamak kato di pakatokan, karano biang nan tak dapek mancabiak, gantiang nan tak dapek ambo putuih i, nan tuo juo punyo hutang. Mananti sutan kabarinyo, mamintak ambo dengan sambah, ba saba sutan sakutiko, lai kolah banamao dalam adaik, sambah kumbali ka bakeh ambo, kan iko bana isinyo Sutan?

Sutan Maruhun                  : Itu bana isinyo Sutan

Sutan Bandaro Putiah      : Asa pintak  ka buliah, kandak ka balaku, baoklah mufakaik Sutan

Sutan Maruhun                  : Insya Allah ka bukik ambo dakikan.